Os socialistas denuncian que o PP "quere privatizar a felicidade" facendo desaparecer o Plan Concertado de prestación de Servizos Sociais

Beatriz Sestayo alerta dun recorte do 80 por cento nas prestacións para os servizos sociais dos concellos

Critica que Feijóo anuncie un incremento das Pensións Non Contributivas cando “a realidade é que diminúen 500.000 euros”

A portavoz de Servizos Sociais do Grupo Socialista, Beatriz Sestayo, denunciou hoxe que o PP “quere privatizar a felicidade” facendo desaparecer paulatinamente o Plan Concertado para a prestación de Servizos Sociais a través dos concellos. Así o dixo no debate dunha Proposición non de Lei socialista para recuperar estas partidas que foi rexeitada polo PP.

Sestayo criticou que mentres a conselleira de Benestar promete que “non haberá recortes e en ningún caso afectarán á asistencia domiciliaria” e mesmo comprometía o pago por adiantado, a realidade é que o pasado luns os concellos “sufriron un recorte do 80 por cento no Plan Concertado” de transferencias da Xunta para a prestación de servizos sociais.

Sestayo puxo exemplos destes recortes drásticos na cidade de Pontevedra –de 222.000 a 25.000 euros, o 85 por cento-, o Consorcio de Ordes –de 90.000 a 9.000-, Amoeiro –de 17.100 a 1.083, o 93 por cento-, Vilamartín –de 10.600 a 720 euros, un 93 por cento menos-, Parada de Sil –de 13.500 a 1.800-, Coles –de 21.700 a 2.600-, Vilaboa –de 11.719 a 1.760- e Betanzos –de 31.252 a 4.121-.

Acusou ao PP de “deixar de lado, abandoados” a centos de persoas dependentes en “situación tráxica” que precisan da axuda pública e apelou á súa “conciencia” e á “obriga legal, moral, constitucional e estatutaria” para prestar estas axudas.

Lamentou que a resposta da Xunta teña sido facer desaparecer programas de axuda ao desenvolvemento do pobo xitano, aos emigrantes, de envellecemento activo, prevención da violencia nas aulas, os centros de protección e atención a afectados polo VIH-Sida, mentres reducen os programas de axuda ao fogar, as oficinas de inclusión social ou os programas de axuda a persoas sen teito.

Deputación de Ourense

A parlamentaria socialista reclamou que “deixen de mentir sempre”, como fixo o presidente da Xunta na sesión de control de hoxe, na que anunciou un incremento nas pensións non contributivas cando “a realidade é que nos orzamentos de 2012 diminúen en 500.000 euros”. Instounos a “seguir o exemplo da Deputación de Ourense”, que aprobou por unanimidade esixirlle á Xunta que restableza as axudas.

A moción socialista aprobada na Deputación de Ourense determina “que non se leve a cabo nin un só recorte en servizos sociais e que tódalas axudas se restablezan tal e como estaban o ano pasado”. Esta iniciativa salientaba o “brutal recorte” que “amosa a verdadeira faciana da dereita” e acusa a Feijóo de “atacar aos máis débiles”.
Santiago de Compostela, 03 de novembro de 11.